“ყიფიანი განტევების ვაცად დანიშნეს… გეგონება დღეს გამოუშვეს იმ სარდაფიდან, სადაც ვინმე ფარცხალაძეს ჰყავდა ჩაკეტილი”- გრიგოლ ვაშაძე

გრიგოლ ვაშაძის თქმით, ლევან ყიფიანს დაკითხვის შემდეგ ტყუილი ალაპარაკეს. მისი შეფასებით, ასეთ მდგომარეობაში საქართველოს ყოფნა სამარცხვინოა.

„არაფორმალურმა მმართველობამ ქვეყანაში დააშინა და მორალურად გაანადგურა იმ საქმის მოწმე, რომელიც უკვე ერთი თვეა, აღელვებს ჩვენს საზოგადოებას. იმის მაგივრად, რომ პროკურატურაში დაეკითხათ ყველა ფიგურანტი, ივანიშვილი, ჩუბინიშვილი, გახარია და ა.შ., ამის მაგივრად, ადამიანი, რომელიც ჯერ მაყურებლად გაამწესეს დამოუკიდებელ ბიზნესში და შემდეგ კი განტევების ვაცად დანიშნეს, გამოიყვანეს და მას არნახული სიყალბე ალაპარაკეს. ვნახეთ მორიგი სერია, რომელიც არის არასასურველი მოწმეების ან დაშინება ან ლიკვიდაცია. მართლაც ისეთი შთაბეჭდილება იყო, რომ ყოფილი ახალგაზრდობის, სპორტის, კულტურის, რისი მინისტრიც იყო, ბატონი დავით ყიფიანი გეგონება დღეს გამოუშვეს იმ სარდაფიდან, სადაც ვინმე ფარცხალაძეს ჰყავდა ჩაკეტილი. სამარცხვინოა საქართველოს დღევანდელ ასეთ მდგომარეობაში ყოფნა,“- განაცხადა გრიგოლ ვაშაძემ.

დღეს თბილისში საქალაქო სასამართლოში დაკითხვიდან გამოსულმა ყოფილმა სპორტის მინისტრმა, ლევან ყიფიანმა განაცხადა, რომ სახელმწიფოსგან ზეწოლაზე ჩანაწერები ომეგა ჯგუფის ხელმძღვანელმა, ზაზა ოქუაშვილმა მასთან შეთანხმებით ჩაწერა უცხოელების დასარწმუნებლად.

მამუკა ბახტაძე – 6 წლის წინ ქართველმა ერმა გააკეთა არჩევანი თავისუფლების სასარგებლოდ და უარი უთხრა ადამიანის ღირსების შელახვაზე დაფუძნებულ რეჟიმს

6 წლის წინ ქართველმა ერმა გააკეთა არჩევანი თავისუფლების სასარგებლოდ და უარი უთხრა ადამიანის ღირსების შელახვაზე დაფუძნებულ რეჟიმს, – ამის შესახებ საქართველოს პრემიერ-მინისტრმა მამუკა ბახტაძე მთავრობის სხდომის დაწყებამდე გამართულ ბრიფინგზე განაცხადა.

მამუკა ბახტაძემ „ქართული ოცნების“ ხელისუფლებაში მოსვლის 6 წელი მოკლედ შეაჯამა და იმ ძირითად ფასეულობებსა და მიზნებზე ისაუბრა, რასაც მისი თქმით, „ქართული ოცნების“ ხელისუფლება ახორციელებს.

„2012 წლის პირველი ოქტომბერი გადამწყვეტი დღე გახდა ჩვენი ქვეყნის დემოკრატიულ გზაზე. 6 წლის წინ ქართველმა ერმა გააკეთა არჩევანი თავისუფლების სასარგებლოდ და უარი უთხრა ადამიანის ღირსების შელახვაზე დაფუძნებულ რეჟიმს. ამ დღეს „ქართულმა ოცნებამ“ ქართველ ხალხთან ერთად მოიპოვა უდიდესი გამარჯვება, მშვიდობიანი გზით შეიცვალა ხელისუფლება და დაიწყო სრულიად ახალი ეტაპი საქართველოს სახელმწიფოებრივი და დემოკრატიული განვითარების გზაზე. საქართველო დღეს ბევრად უფრო ძლიერია ვიდრე 6 წლის წინ. ჩვენ მივაღწიეთ წინსვლას ყველა სფეროში და ეს პროგრესი არის ხელშესახები. მაგრამ რჩება უამრავი სირთულე და გამოწვევა, რომელსაც დარწმუნებული ვარ, ჩვენ, ქართველ ხალხთან ერთად აუცილებლად გადავლახავთ.

ჩვენი მიზანია საქართველო გახდეს ერთიანი, ეკონომიკურად ძლიერი და განვითარებული ევროპული ქვეყანა, მივაღწიოთ ჩვენს საერთაშორისო მიზნებს, რომ საქართველო გახდეს ევროპული ოჯახის სრულფასოვანი წევრი და ნატო-ს სრულფასოვანი წევრი“, – განაცხადა მამუკა ბახტაძემ.

პრემიერ-მინისტრის გამოსვლა გაეროს გენერალურ ასამბლეაზე – სრული ტექსტი

საქართველოს პრემიერ-მინისტრი მამუკა ბახტაძე გაეროს გენერალური ასამბლეის 73-ე სესიაზე სიტყვით გამოვიდა.

“პირველი” პრემიერის გამოსვლას უცვლელად გთავაზობთ.

“ჩემთვის დიდი პატივია, რომ გამოვდივარ გენერალური ასამბლეის წინაშე და მოგმართავთ ჩემს მშობლიურ, ქართულ ენაზე, რომელიც მსოფლიო ცივილიზაციის ერთ-ერთი უძველესი და განუყოფელი ნაწილია.

დღეს 27 სექტემბერია – უაღრესად მძიმე და ტკივილით სავსე თარიღი ჩემი ქვეყნის ისტორიაში. 25 წლის წინ, სწორედ ამ დღეს დაიწყო საქართველოს ისტორიული ნაწილის ოკუპაცია. რაც უმძიმეს გამოწვევად იქცა საქართველოს ახლად აღდგენილი სახელმწიფოებრიობისათვის.

10 წლის წინ კი, რუსეთის ფედერაციამ ჩემი ქვეყნის წინააღმდეგ კიდევ ერთი ფართომასშტაბიანი სამხედრო აგრესია განახორციელა, რასაც შედეგად მოჰყვა საქართველოს ორი ისტორიული და განუყოფელი რეგიონის – აფხაზეთისა და ცხინვალის სრულმასშტაბიანი ოკუპაცია.

ამ სამხედრო აგრესიიდან 10 წლის შემდეგ ჩვენი ტერიტორიები კვლავ ოკუპირებულია. ეთნიკური წმენდის შედეგად, საქართველოს მოსახლეობის 10 პროცენტი დღემდე დევნილობაშია, ფეხქვეშ ითელება ასობით ათასი ჩვენი მოქალაქის უფლებები.

უმძიმესი და საგანგაშოა აფხაზეთსა და ცხინვალის რეგიონში შექმნილი მდგომარეობა.

ოკუპირებულ ტერიტორიაზე არსებული სიტუაცია არის უმწვავესი ხარისხის ჰუმანიტარული კატასტროფა. მიმდინარეობს ამ რეგიონების მზარდი მილიტარიზაცია, სულ უფრო მწვავე სახეს იღებს დეპოპულაცია, მოსახლეობის რაოდენობის მკვეთრი შემცირება. ჰუმანიტარული, სოციალურ-ეკონომიკური და ადამიანის უფლებების კუთხით შექმნილი უმძიმესი პირობების გამო ოკუპაციამდელ პერიოდთან შედარებით, 4-ჯერ, 5-ჯერ არის შემცირებული მოსახლეობის რაოდენობა ოკუპირებულ ტერიტორიებზე.

მავთულხლართები და სხვა ხელოვნური ბარიერები ერთმანეთს აშორებს ოჯახებს და არღვევს ადამიანების ფუნდამენტურ უფლებებს. საოკუპაციო ხაზებთან მცხოვრებ მოსახლეობას სალოცავებისა და წინაპართა საფლავების მონახულების საშუალებაც კი არ ეძლევა. ჩვენს მოქალაქეებს უკრძალავენ, მშობლიურ ენაზე მისცენ განათლება საკუთარ შვილებს.

გრძელდება გატაცების, არაადამიანური და სასტიკი მოპყრობის, წამების და მკვლელობის ფაქტები. ამის მსხვერპლი ბოლო ხანს გახდნენ ჩვენი მოქალაქეები არჩილ ტატუნაშვილი, გიგა ოთხოზორია, 18 წლის დავით ბაშარული.

სწორედ ამ და სხვა სასტიკი დანაშაულების საფუძველზე შეიქმნა „ოთხოზორია-ტატუნაშვილის სია“, რომელშიც ჩაიწერა ამ დანაშაულების ჩამდენი პირების გვარები. ამ სიის ფიგურანტებს საერთაშორისო სამართლით უნდა მოეთხოვოთ პასუხი.

ოკუპაციამ და კანონიერების უხეშმა ხელყოფამ სერიოზული გამოწვევები შეუქმნა არა მხოლოდ საქართველოს, არამედ მთლიანად რეგიონის სტაბილურობასა და უსაფრთხოებას. სამხრეთ კავკასიაში არსებული კონფლიქტების გათვალისწინებით, სულ მცირე ინციდენტიც კი შეიძლება გადაიზარდოს უკონტროლო პროცესში, შესაბამისი მძიმე შედეგებით.

უმნიშვნელოვანესია საერთაშორისო საზოგადოების ურყევი მხარდაჭერა რუსეთ-საქართველოს კონფლიქტის მშვიდობიანი მოგვარების პროცესში. საერთაშორისო თანამეგობრობა ერთიანი და პრინციპული უნდა იყოს სუვერენული ქვეყნების თავისუფლებისა და საერთაშორისოდ აღიარებული საზღვრების ურღვევობის პრინციპის სადარაჯოზე, რადგან საერთაშორისო სამართლის ფუნდამენტური ნორმებისა და ადამიანის უფლებების დაცვა არის ერთადერთი გზა მსოფლიოში მშვიდობისა და უსაფრთხოებისკენ.

რუსეთი დღემდე არ ასრულებს ნაკისრ საერთაშორისო ვალდებულებებს და 2008 წელს ევროკავშირის შუამდგომლობით მიღწეულ ცეცხლის შეწყვეტის შეთანხმებას.

ხოლო ჩვენ ეს შეთანხმება სრულად შევასრულეთ და უფრო მეტიც, ავიღეთ ძალის არგამოყენების იურიდიულად სავალდებულო პასუხისმგებლობა. ეს კიდევ ერთხელ ხაზს უსვამს ჩვენს შეუქცევად პოლიტიკას, მხოლოდ მშვიდობიანი გზით მივაღწიოთ კონფლიქტის დარეგულირებას.

შესაბამისად, მივმართავ რუსეთის ფედერაციას: შეასრულეთ ნაკისრი, ხელმოწერილი საერთაშორისო ვალდებულებები და გაიყვანეთ თქვენი ჯარები საქართველოს ტერიტორიიდან!

ჩვენ ვცდილობთ აქტიურად გამოვიყენოთ ჟენევის საერთაშორისო მოლაპარაკებების ფორმატი. თუმცა, ჩვენი მცდელობა მოლაპარაკების მაგიდასთან დღემდე რუსეთის მხრიდან დაუსაბუთებელ და ყოვლად მიუღებელ წინააღმდეგობას აწყდება. მინდა კიდევ ერთხელ აღვნიშნო, რომ ჩვენთვის განსაკუთრებით მნიშვნელოვანია გაეროს ძალისხმევა ჟენევის მოლაპარაკებების პროცესში, რომელსაც ეუთოსა და ევროკავშირთან ერთად დისკუსიების თანათავმჯდომარის ფუნქციაც აკისრია.

დღეს, 21-ე საუკუნეში, როდესაც ადამიანები, როდესაც ერები, კულტურები ისწრაფვიან მეტი ინტეგრაციისა და განვითარებისკენ, ყოვლად დაუშვებელია ხელოვნური ბარიერების შექმნა და მავთულხლართების გაბმა.

ჩვენ გვინდა ურთიერთობების ჩიხიდან გამოყვანა, მაგრამ მხოლოდ სახელწიფო სუვერენეტეტის, ტერიტორიული მთლიანობის, ადამიანების უფლებების დაცვის და საერთაშორისო სამართლის პრინციპების პატივისცემის საფუძველზე.

მიუხედავად ამ უსამართლობისა, ჩვენი პასუხი ამ გამოწვევებზე არის მხოლოდ მშვიდობა და საქართველოს განვითარება. ჩვენ წარმოვადგინეთ სამშვიდობო ინიციატივა, რომლის მიზანია ოკუპირებულ ტერიტორიებზე არსებული ჰუმანიტარული კატასტროფის დაძლევა და ახალი შესაძლებლობების შექმნა ოკუპირებულ ტერიტორიებზე მცხოვრები ჩვენი მოქალაქეებისთვის. ამ ინიციატივებით ჩვენ ვიბრძვით, რომ შევაჩეროთ ოკუპირებული ტერიტორიების მოსახლეობისგან დაცლის პროცესი და უზრუნველვყოთ ადამიანის ფუნდამენტური უფლებების დაცვა.

ამ ინიციატივას ჩვენ დავარქვით “ნაბიჯი უკეთესი მომავლისკენ”, რომლის მიზანია სწორედ ის, რომ ოკუპირებულ ტერიტორებზე მცხოვრებ მოსახლეობას მივცეთ წვდომა ჯანდაცვისა და განათლების სერვისებზე, შევუქმნათ მათ პირობები კომერციული საქმიანობისთვის, საკუთარი ოჯახების გამოკვებისა და ფიზიკური გადარჩენისთვის.

დღეს ამ ტრიბუნიდან მინდა მივმართო ჩვენს აფხაზ და ოს თანამოქალაქეებს: საქართველოს თითოეული წარმატება თქვენი წარმატებაა! ჩვენ საუკუნოვანი საერთო ისტორიული წარსული გვაკავშირებს, რომელიც საფუძვლად უნდა დავუდოთ ჩვენს მომავალს, რაც, დარწმუნებული ვარ, მოგვიტანს მშვიდობასა და კეთილდღეობას.

საქართველოს ხელისუფლებას აქვს ვალდებულება, დაიცვას და უზრუნველყოს თავისი ყველა მოქალაქის უფლება და ჩვენ ამას შეუქცევადად და მიზანმიმართულად ვახორციელებთ.

თქვენ უნდა ისარგებლოთ ყველა იმ სიკეთით, რაც საქართველომ შექმნა – იქნება ეს ადამიანის უფლებები, განათლება, ჯანდაცვა, ევროპასთან უვიზო მიმოსვლა თუ სხვა. მინდა მივმართო განსაკუთრებით ახალგაზრდებს: ჩვენ ერთად, ერთობლივი მონდომებით უნდა მივაღწიოთ საერთო წარმატებას. ჩვენ, ჩვენ იმომავალი მხოლოდ თქვენთან ერთად წარმოგვიდგენია.

მინდა, კიდევ ერთხელ მოვუწოდო რუსეთს, ნუ უშლის ხელს და ნუ აფერხებს ჩვენს სამშვიდობო ინიციატივებს, მისცეს ოკუპირებულ ტერიტორიებზე მცხოვრებ მოქალაქეებს ღირსეული ცხოვრების საშუალება.

ქალბატონებო და ბატონებო,

საართველო მდიდარი კულტურისა და ისტორიის ქვეყანაა, რომელიც მუდამ იდგა და დღესაც დგას მსოფლიოს ცივილიზებული ერების გვერდით. საქართველოს თავისი წვლილი შეჰქონდა და შეაქვს ევროპული და მსოფლიო ცივილიზაციის განვითარებაში.

შესაბამისად, ჩვენ დღესაც ჩართულები ვართ იმ გამოწვევების წინააღმდეგ ბრძოლაში, რომელთა წინაშეც დგას დღეს მთელი კაცობრიობა. ჩამონათვალი, სამწუხაროდ, დიდია: კონფლიქტები, ტერორიზმი, მიგრაციული კრიზისი, ლტოლვილთა პრობლემა, კლიმატის ცვლილება, სიღარიბე, ადამიანის უფლებების უხეში დარღვევები, – ეს ის პრობლემებია, რომლებთან გამკლავებაც დიდ ძალისხმევასა და ურყევ პოლიტიკურ პოზიციას მოითხოვს გაეროსგან, მისი თითოეული წევრი ქვეყნისგან. ამ გამოწვევათა დაძლევა გვჭირდება ყველას, თითოეულ ჩვენგანს, რათა მსოფლიო გავხადოთ უკეთესი.

ჩვენ ღრმად გვწამს, რომ თანამედროვე მსოფლიოში ეროვნული ინტერესების დაცვა ურთიერთპატივისცემით უნდა ხდებოდეს და არავითარ შემთხვევაში – ერთმანეთის ხარჯზე.

სწორედ ამ კონტექსტში მინდა გამოვეხმაურო ამ გენერალური ასამბლეის თემას და განვაცხადო, – მზად ვართ ჩვენი წვლილი შევიტანოთ საერთო მიზნის მიღწევის საქმეში, მშვიდობიანი, მდგრადი, სამართლიანი საზოგადოებების განვითარებისთვის და ხელი შევუწყოთ ამ პროცესში გაეროს როლის გაძლიერებასა და მისი მიზნების უკეთ შესრულებას.

ძვირფასო კოლეგებო,

100 წლის წინ დემოკრატიული რესპუბლიკის დაფუძნებით საქართველომ თავისი ცივილიზაციური არჩევანი კიდევ ერთხელ დაადასტურა და ამით ჩვენი ერის მომავალი განსაზღვრა – ჩვენი ადგილი საერთო ევროპულ ოჯახშია.

ეს არჩევანი დღესაც უცვლელია, ეს გახლავთ ევროპული იდენტობის დამადასტურებელი კიდევ ერთი ძლიერი არგუმენტი.

საქართველო თავისი ღირებულებებით, თავისი შეტანილი წვლილით ყოველთვის იყო ევროპის ორგანული ნაწილი და დღესაც ევროკავშირთან წარმატებული თანამშრომლობით განაგრძობს ამ გზაზე წინსვლას.

100 წლის წინ, როდესაც საქართველომ დამოუკიდებლობა გამოაცხადა, მის კონსტიტუციას სწორედ ის ღირებულებები და პრინციპები დაედო საფუძვლად, რომლებიც დღემდე აქტუალური და პროგრესულია.

ამის დასტურად მხოლოდ ერთ მაგალითს მოგიყვანთ – 100 წლის წინანდელ საქართველოს მრავალპარტიულ პარლამენტში უკვე წარმოდგენილი იყო 5 ქალი, რაც იმდროინდელი დემოკრატიული ქვეყნებისთვისაც კი დიდი იშვიათობა გახლდათ.

სწორედ ასეთ დიდ მოვლენას, დემოკრატიული რესპუბლიკის გამოცხადების 100 წლის იუბილეს აღნიშნავს წელს ჩემი ქვეყანა, რომელმაც 27 წლის წინ აღიდგინა დამოუკიდებლობა და თანამედროვე დემოკრატიული სახელმწიფოს შენება დაიწყო. ეს თითქოს ისტორიისთვის ცოტაა, მაგრამ, ბევრია იმ ქარტეხილებისთვის, რომელთა გადატანაც ჩვენს ახალგაზრდა დემოკრატიას მოუწია. დღეს ქართული სახელმწიფო ზუსტად იმ ღირებულებების მემკვიდრე და გამგრძელებელია, რომლებსაც საუკუნის წინ ჩაეყარა საფუძველი.

პროგრესი, რომელსაც საქართველომ უკანასკნელ წლებში მიაღწია დემოკრატიის კონსოლიდაციის, ადამიანის უფლებების დაცვის, კანონის უზენაესობის განმტკიცების მიმართულებით, ერთმნიშვნელოვნად ქვეყანაში განხორციელებული ძირეული ცვლილებებისა და რეფორმების შედეგია.

ძლიერი პარლამენტი, ზეპარტიული პრეზიდენტი, დამოუკიდებელი სასამართლო, ეფექტიანი მთავრობა არის იმ ისტორიული საკონსტიტუციო რეფორმის შედეგი, რომელიც წარმატებით განვახორციელეთ – ქვეყანა ამ ცვლილებებით სწორედ ევროპულ საპარლამენტო მმართველობაზე გადადის.

ჩვენთვის ქვეყნის განვითარების ამოსავალი წერტილია თავისუფალი ადამიანი და მის მიერ შექმნილი ადამიანური კაპიტალი. განათლების სფეროს ამბიციური რეფორმა, განათლების სისტემის მოდერნიზაცია კიდევ ერთი გარღვევა იქნება იმ მთავარი გამოწვევის გადასაჭრელად, რომლის დღეს დგას ჩემი ქვეყნის წინაშე. მხოლოდ განათლებული, მოტივირებული, საკუთარ ძალებში დარწმუნებული ახალგაზრდობა მოიტანს პროგრესს, დაძლევს სიღარიბეს და საქართველოს ჩააყენებს განვითარებული და ინოვაციური ეკონომიკის მქონე ქვეყანათა რიცხვში.

მცირე ზომის და მოქნილ მთავრობას აბალანსებს ძლიერი საჯარო – ინსტიტუციური კონტროლის მექანიზმები და სამოქალაქო საზოგადოება, რაც ეხმიანება მდგრადი განვითარების მიზნით გაეროს მიერ განსაზღვრული გეგმის მე-16 პუნქტის მიხედვით ჩვენს მიერ აღებულ ვალდებულებებს.

გასულ წელს საქართველოს არჩევა „ღია მმართველობის პარტნიორობის“ თავმჯდომარედ ჩვენ მიერ განხორციელებული რეფორმების ერთმნიშვნელოვანი აღიარებაა და კონკრეტული შედეგების მომტანია ჩვენი საზოგადოებისთვის.

ადამიანის ფუნდამენტური უფლებებისა და ღირსების დაცვა ჩვენთვის უმთავრესი პრიორიტეტია. ამ კუთხით, უკანასკნელ წლებში საქართველო გახდა ლიდერი რეფორმატორი ქვეყანა. განსაკუთრებით ხაზგასასმელია, რომ ჩვენ დავძლიეთ უმძიმესი გამოწვევა, რომელიც პენიტენციურ სისტემაში დაგვხვდა. დღეს თვალსაჩინო პროგრესი გვაქვს ციხეებში პატიმართა უფლებების დაცვის მხრივ.

ჩვენ გავატარეთ მნიშვნელოვანი რეფორმები სასამართლო სისტემაში, რომელსაც ვაგრძელებთ და დაგეგმილი გვაქვს რეფორმის შემდეგი ეტაპი.

ჩვენი პოლიტიკური ძალის ერთ-ერთი მთავარი მონაპოვარი გახლავთ მედიის თავისუფლება და მედიაპლურალიზმი. 2018 წელს მსოფლიო პრესის თავისუფლების ინდექსში საქართველომ პოზიციები კიდევ უფრო გაიუმჯობესა. განსაკუთრებული მიღწევები გვაქვს ინტერნეტის თავისუფლების კუთხითაც.

დემოკრატიის მშენებლობის პროცესში სამოქალაქო საზოგადოებას განმსაზღვრელი როლი აქვს, ძლიერი სამოქალაქო საზოგადოების გარეშე, მით უფრო ახალგაზრდა დემოკრატიის პირობებში, ქვეყნის ჰარმონიული განვითარება შეუძლებელია. ჩვენი სურვილია ქვეყანაში ჩამოყალიბდეს დამოუკიდებელი, ძლიერი და აქტიური სამოქალაქო საზოგადოება.

მდგრადი განვითარების პოლიტიკის ჩარჩოებში ჩვენ პრიორიტეტად განვსაზღვრეთ მწვანე პოლიტიკა და მწვანე ეკონომიკა.

ამასთან ერთად ვავითარებთ ციფრულ ეკონომიკას, რომელიც თვისობრივად ახალ ეტაპზე გადაიყვანს ქვეყანას.

ჩვენი ეკონომიკური სტრატეგია ეფუძნება ინკლუზიურ ეკონომიკურ განვითარებას, ისეთ ეკონომიკურ ზრდას, რომელიც აისახება თითოეული მოქალაქის კეთილდღეობაზე. ჩვენ ვართ წარმატებულები ამ სტრატეგიის რეალიზაციაში, რომელიც გულისხმობს საქართველოს გადაქცევას რეგიონის ეკონომიკურ, ტურისტულ, ლოგისტიკურ და საგანმანათლებლო ცენტრად. ამას ცხადყოფს ჩვენი მოწინავე პოზიციები წამყვან საერთაშორისო რეიტინგებში.

ჩვენი ქვეყნის უნიკალური გეოგრაფია, სტრატეგიული მდებარეობა ევროპასა და აზიას შორის, საუკუნეების განმავლობაში საქართველოს ცივილიზაციათა შეხვედრის, კულტურათა დიალოგის მიმზიდველ ადგილად ხდიდა. ჩვენ დღესაც ვასრულებთ ამფუნქციას და შესაბამისად, ვახორციელებთ ამბიციურ და საპასუხისმგებლო პროექტებს.

რამდენიმე წლის წინ, ჩვენ ამ ტრიბუნიდან მივმართეთ მსოფლიოს და შევთავაზეთ “აბრეშუმის გზის ფორუმის” ჩატარება საქართველოში. ჩვენ ეს ფორუმი არა მარტო რეალობად ვაქციეთ, არამედ ამით საქართველომ დაიბრუნა ისტორიული როლი აბრეშუმის გზის დიდ რეგიონში.

დღეს კი მსურს, ახალი ინიციატივით გამოვიდე და შემოგთავაზოთ “თბილისის ფორუმის” ჩატარება, რომლის მთავარი მიზანი იქნებაშავი ზღვის რეგიონი და კავკასია, რომელიც დღეს დაპირისპირებისა და გამოწვევების არეალია – გადაიქცეს მშვიდობის, თანამშრომლობის და განვითარების სივრცედ.

საქართველოს ყველა მიღწევა, დემოკრატიული და ეკონომიკური განვითარება, რეგიონში ლიდერის პოზიცია მრავალი მიმართულებით, სწორედ ჩვენი ევროპული და ევროატლანტიკური არჩევანის შედეგია, რაც კონსტიტუციითა და პარლამენტის შესაბამისი რეზოლუციით გახლავთ გამყარებული.

დინამიკური და ყოვლისმომცველი გახდა ნატო-საქართველოს ურთიერთობები. საქართველო ნატოს ასპირანტი ქვეყანაა, იგი გახლავთ ალიანსის „გაზრდილი შესაძლებლობების პარტნიორი“ და ერთ სულ მოსახლეზე ყველაზე დიდი კონტრიბუტორი ავღანეთში ნატოს მისიაში, რითაც საქართველ ოსთავისი წვლილი შეაქვს მსოფლიოში უსაფრთხოების არქიტექტურის განმტკიცების თვალსაზრისით.

მოგეხსენებათ, რამდენად შემაშფოთებელია საერთაშორისო ტერორიზმიდან მომდინარე საფრთხე, რომელიც დღეს გაცილებით დიდი და ფაქტობრივად ყოვლისმომცველია, ვიდრე ოდესმე. ტერორიზმი 21-ე საუკუნეში ყველასთვის საერთო მტერია. ამ მტრის წინააღმდეგ ბრძოლაში საქართველო იდგა და ყოველთვის იდგება საერთაშორისო საზოგადოების გვერდით. სამწუხაროდ, მრავალი რჩეული ქართველი ჯარისკაცის სიცოცხლე შეეწირა ამ გლობალურ ბრძოლას.

ყველა ვთანხმდებით, რომ ტერორიზმთან ბრძოლა მხოლოდ ერთიანი ძალისხმევითა და პასუხისმგებლობის გაზიარებით არის შესაძლებელი, ისევე, როგორც მისი პრევენცია და მასზე ადეკვატური რეაგირება. მე მჯერა, რომ საერთაშორისო ძალისხმევით ჩვენ დავამარცხებთ ამ საერთო გამოწვევას.

ქალბატონებო და ბატონებო,

საქართველოს სატკივარი არ არის მხოლოდ ერთი ქვეყნის პრობლემა.

2008 წელს საქართველოს მიმართ რუსეთის აგრესია მსოფლიოს მიერ მხოლოდ ორ სახელმწიფოს შორის ურთიერთობის პრობლემად იყო აღქმული.

მოვლენების შემდგომმა განვითარებამ უკრაინაში გამოაჩინა, რომ მაშინდელი მსოფლიო თანამეგობრობა არ აღმოჩნდა მზად, შესაბამისი შეფასება და რეაგირება მიეცა ამ აგრესიისთვის.

სამწუხაროდ, გაერო – არაეფექტური აღმოჩნდა ამ გამოწვევების წინაშე. მეტიც, ჩვენს თვალწინ მიმდინარეობს გლობალური უსაფრთხოების სისტემური ეროზია. დღევანდელ მსოფლიოს სჭირდება უფრო ძლიერი გაერთიანებული ერების ორგანიზაცია.

დღეს მსოფლიო საზოგადოება საჭიროებს ისეთ ინსტიტუტებს, რომლებიც შეძლებენ, არსებულ გამოწვევებს მისცენ კონკრეტული შეფასება, მოახდინონ ადეკვატური რეაგირება და ასევე იმ რისკების პრევენცია, რომლებიც ძირს უთხრის გლობალურ უსაფრთხოებას.

მოგეხსენებათ, გაეროს რეფორმირების საკითხზე მსჯელობა ჯერ კიდევ 90-იანი წლებიდან მოდის, თუმცა, უნდა ვაღიაროთ, რომ ამ საქმეში სერიოზულ წარმატებებზე ვერ ვისაუბრებთ. ამიტომაც, გაეროს რეფორმირების საკითხი კვლავ აქტუალურია და ვფიქრობ, სასწრაფო გადაწყვეტას საჭიროებს.

დღეს, როდესაც მსოფლიო ახალი ეპოქის გამოწვევებისა და ჯერ კიდევ უცნობი პრობლემების წინაშეა, თითოეული ჩვენგანის და ყველასი ერთად ამოცანაა, ვიზრუნოთ და ერთობლივად გადავლახოთ გლობალური გამოწვევები იმისთვის, რომ მშვიდობიანი და უკეთესი მსოფლიო დავუტოვოთ მომავალ თაობებს!”,-განაცხადა მამუკა ბახტაძემ.

„ამ სკანდალით ჯანდაცვის სფეროს ყველა წარმატება გადაიხაზება, მინისტრი უნდა გადადგეს” – ჭიჭინაძე სააფთიაქო სკანდალზე

„ძალიან ცუდი ფაქტია და ვფიქრობ, ეს ერთ-ერთი ყველაზე სერიოზული დარტყმაა. ის წარმატებული სფერო, რაც იყო ჯანდაცვა, განვითარებული მოვლენების საფუძველზე საკმაოდ დაზიანდა. ახლა უნდა დაველოდოთ გამოძიებას, აღნიშნული ფაქტი შეესაბამება თუ არა სიმართლეს,” – აცხადებს პარლამენტის წევრი დავით ჭიჭინაძე „რეზონანსთან” საუბრისას.

სამედიცინო საქმიანობის სახელმწიფო რეგულაციების სააგენტოს ყოფილი ხელმძღვანელი გია თვალავაძე, რომელიც გუშინ გულის შეტევით ციხიდან კლინიკაში გადაიყვანეს, მკურნალობას ამ დრომდე ჩაფიძის კლინიკაში განაგრძობს.

იგი დაკავებულ იქნა სამსახურეობრივი საქმიანობის ბოროტად გამოყენების, ე.წ. სააფთიაქო ნარკომანიის ბრალდებით. როგორც ცნობილია, თვალავაძის მიერ შემოსავლის საერთო ჯამი 4 094 709 ლარს შეადგენს. მასთან ერთად, სამეწარმეო საქმიანობის ბრალდებით, დაკავებულია კიდევ 5 პირი. მათ თბილისის საქალაქო სასამართლომ გუშინ აღკვეთის ღონისძიების სახით პატიმრობა შეუფარდა.

დავით ჭიჭინაძემ ჩვენთან საუბრისას განაცხადა, რომ ყველა მინისტრი პასუხისმგებელია მის სამინისტროში მიმდინარე მოვლენეზე.

„ქართული ოცნების” ყველა მონაპოვარი ჯანდაცვის სფეროში ამ სკანდალით გადაიხაზება და ეს ერთ-ერთი წარმატებული სფეროც ჩავარდება ყველა იმ წარუმატებელში, რაც დანარჩენში არსებობს.

„მინისტრის გადადგომასა და ამ სააგანეტოს საქმიანობას ერთმანეთს ვერ დავუკავშირებ, იქიდან გამომდინარე, რომ ერთმანეთთან შემხებლობაში ნაკლებად არიან. თუ გამოძიება დაადასტურებს ამ ყველაფერს, პოლიტიკური პასუხისმგებლობა არსებობს და ამ შემთხვევაში მინისტრი უნდა გადადგეს. ყველა მინისტრი პასუხისმგებელია მის სამინისტროში მიმდინარე მოვლენებზე,” – აცხადებს ის.

ჭიჭინაძე ვარაუდობს, რომ ჯანდაცვის მინისტრს დავით სერგეენკოს აღნიშნულთან დაკავშირებით ინფორმაცია არ ჰქონია.

„დავით სერგეენკოს კარგად ვიცნობ, ვიცი მისი მსოფლმხედველობა და ნამდვილად ვერ წარმოვიდგენ, რომ ბატონი დავითი ამ საქმეში გარეულია, ან ინფორმირებული იყო და თვალს ხუჭავდა ამ ყველაფერზე.

„ზოგადად, სააფთიაქო ნარკომანია დიდი ხანია განხილვის თემაა. ეს ფაქტი ჯანდაცვის სამინისტროსთვის ყველანაირად დამაზიანებელია. თან ისიც ერთვის, რომ როგორც ამბობენ მთელი სამსახური იყო ჩართული და უამრავი ადამიანია დაკავებული. არა მგონია, რომ ეს ვინმეს რეპუტაციას წაადგეს, ეს არა მარტო ჯანდაცვის სამინისტროზე კი არა, მთელ მთავრობაზე ცუდად იმოქმედებს,” – განაცხადა დავით ჭიჭინაძემ.

რაც შეეხება თავად ყოფილი მაღალჩინოსნის ჯანმრთელობის მდგომარეობას, თვალავაძის ადვოკატის, ლალი აფციაურის ინფორმაციით, საკმაოდ მძიმეა და მისი გადაადგილება შეუძლებელია. ამ ინფორმაციას „ინტერპრესიუსი” ავრცელებს.

„გია თვალავაძის ჯანმრთელობის მდგომარეობა საკმაოდ სერიოზულია. გულის დაავადების გარდა მას კიდევ სხვა კუთხით შეექმნა პრობლემები. ჯანმრთელობის მდგომარეობის კონფიდენციალურობიდან გამომდინარე, დეტალებში არ მინდა შევიდე, თუმცა ინფორმაცია მის ჯანმრთელობაზე საკმაოდ სერიოზულია.

„როგორც აღვნიშნე, გულის პრობლემის გარდა სერიოზული დაავადებაც აწუხებს და ჯერ კიდევ გამოკვლევები მიმდინარეობს. დიაგნოზიც კი არ გვაქვს. ისევ რჩება ჩაფიძის გულის კლინიკაში. ამ ეტაპზე კატეგორიულად გამორიცხულია მისი ადგილიდან დაძვრა, გადაადგილება”, – განაცხადა აფციაურმა „ინტერპრესიუსთან” საუბრისას.

დავით ზალკალიანმა ევროკავშირის წევრი ქვეყნების საგარეო საქმეთა სამინისტროების პოლიტიკურ დირექტორებთან შეხვედრა გამართა

საქართველოს საგარეო საქმეთა მინისტმა დავით ზალკაიანმა, ნიუ-იორკში ვიზიტის ფარგლებში, შეხვედრა გამართა ევროკავშირის წევრი ქვეყნების საგარეო საქმეთა სამინისტროების პოლიტიკურ დირექტორებთან.

საგარეო საქმეთა სამინისტროს პრესსამსახურის ინფორმაციით, შეხვედრა ტრადიციულ ფორმატს ატარებს და უკვე რამდენიმე წელია გაერო-ს გენერალური ასამბლეის სესიების ფარგლებში ტარდება.

შეხვედრაზე საქართველოს საგარეო საქმეთა მინისტრმა მადლობა გადაუხადა ევროკავშირის წევრ სახელმწიფოებს საქართველოს მტკიცე მხარდაჭერისათვის და ისაუბრა საქართველოს, როგორც საგარო პოლიტიკის პრიორიტეტებზე, ისე ქვეყნის განვითარების სამთავრობო ხედვაზე.

მინისტრმა ხაზი გაუსვა, რომ საქართველოს ევროპული და ევრო-ატლანტიკური ინტეგრაცია პრემიერ-მინისტრისა და ახალი მინისტრთა კაბინეტის საქმიანობის ხუთ უმთავრესი პრიორიტეტშია აღნიშნული და ითვალისწინებს მთავრობის აქტიურ ქმედებებს ევროკავშირსა და ნატოში საქართველოს სრულფასოვანი წევრობისთვის.

როგორც დავით ზალკალიანმა აღნიშნა, ქვეყნის ევროპული კურსი გამყარებულია საქართველოს კონსტიტუციით და საქართველოს პარლამენტის შესაბამისი რეზოლუციით. ევროკავშირში ინტეგრაციის პროცესზე საუბრისას, მინისტრმა ყურადღება გაამახვილა საქართველოს მიერ ასოცირების შეთანხმების იმპლემენტაციის წარმატებულ პროცესზე. მინისტრმა ასევე ისაუბრა საქართველოს მთავრობის ინიციატივაზე „ევროკავშირში ინტეგრაციის საგზაო რუკის შესახებ და აღნიშნა, რომ კომპლექსური გეგმა მიზნად ისახავს საქართველოს მეტ დაახლოებას ევროკავშირთან, როგორც სტრუქტურულ, ისე საკანონმდებლო და ინსტიტუციურ დონეზე.

დავით ზალკალიანმა ასევე ყურადღება გაამახვილა საქართველოსა ევროკავშირს შორის დიალოგის ახალ უმაღლესი დონის ფორმატზე, რომელიც უპრეცედენტოა და რომლის პირველი შეხვედრაც მიმდინარე წლის ნოემბერში საქართველოს პრემიერ-მინისტრის მამუკა ბახტაძის და ევროკომისიის რეზიდენტის ჟან კლოდ იუნკერის ხელმძღვანელობით გაიმართება.

როგორც მინისტრმა აღნიშნა, ეს ფორმატი მნიშვნელოვნად შეუწყობს ხელს საქართველოს ევროკავშირთან შემდგომ დაახლოებას და სექტორულ ინტეგრაციას და უმაღლეს პოლიტიკურ დონეზე გაუწევს ზედამხედველობას ამ პროცესს. შეხვედრაზე საუბარი ასევე შეეხო საქართველოს პროგრესს ევრო-ატლანტიკური ინტეგრაციის პროცესში და ნატო-ს ბრიუსელის სამიტის შედეგებს.

შეხვედრაზე ასევე ყურადღება გამახვილდა საქართველოს ოკუპირებულ რეგიონებში შექმნილ ვითარებაზე და აღინიშნა, რომ აუცილებელია საქართველოს საკითხი მუდმივად იდგეს საერთაშორისო თანამეგობრობის დღის წესრიგში, ასევე ევროკავშირის წევრი სახელმწიფოების რუსეთთან ორმხრივი დიალოგში.

მან განსკუთრებით გაუსვა ხაზი ევროკავშირის ჩართულობის მნიშვნელობას კონფლიქტის მშვიდობიანი მოგვარების პროცესში და აღნიშნა ევროკავშირის სადამკვირვებლო მისიის როლი ადგილზე ვითარების მონიტორინგსა და შემდგომი ესკალაციის თავიდან აცილების პროცესში.

ოკუპირებულ რეგიონებში შექმნილ მდგომარეობაზე საუბრისას, მინისტრმა ყურადღება გაამახვილა ადამიანის უფლებების უხეში დარღვევისა და სიცოცხლის ხელყოფის კონკრეტულ ფაქტებზე. დავით ზალკალიანმა ევროკავშირის წევრი ქვეყნების პოლიტიკურ დირექტორებს მიაწოდა ინფორმაცია საქართველოს პარლამენტის შესაბამისი რეზოლუციის და ტატუნაშვილი ოთხოზორიას სიის შესახებ. მან მადლობა გადაუხადა ლიეტუვას აღნიშნულ სიაში შეყვანილი პირების მიმართ დაწესებული სანქციებისათვის. მინისტრმა საქართველოს მიმართ გამოხატულ მნიშვნელოვან მხარდაჭერად შეაფასა ევროპარლამენტის შესაბამისი რეზოლუცია, რომელიც ასევე მოუწოდებს წევრ სახელმწიფოებს სათანადო რეაგირება მოახდინონ საქართველოს ოკუპირებულ რეგიონებში ადამიანის უფლებების დარღვევებზე.

შეხვედრაზე საუბარი შეეხო საქართველოს მთავრობის სამშვიდობო პოლიტიკას. მინისტრმა ევროკავშირის პოლიტიკურ დირექტორებს გააცნო ინიციატივა ნაბიჯი უკეთესი მომავლისგან და აღნიშნა რომ იგი მიზნად ისახავს კონფლიქტით გაყოფილ მოსახლეობას შორის ნდობის აღდგენას .

საუბარი ასევე შეეხო ჟენევის საერთაშორისო მოლაპარაკებების პროცესის მიმდინარეობას.

ევროკავშირის პოლიტიკურ დირექტორებთან შეხვედრაზე ასევე ისაუბრეს საქართველოს ეკონომიკურ განვითარებასა და ქვეყნის ჩართულობაზე საერთაშორისო სატრანზიტო ენერგეტიკულ პროექტებში.

ევროკავშირის წევრი სახელმწიფოების პოლიტიკურმა დირექტორებმა კიდევ ერთხელ გამოხატეს მხარდაჭერა საქართველოს სუვერენიტეტისა და ტერიტორიული მთლიანობის, ასე საქართველოს ევროპული და ევრო-ატლანტიკური ინტეგრაციის პროცესის მიმართ.

სალომე ზურაბიშვილი – მე ვიქნები დედოფალი კამპანიის, რამდენად წარმოადგენს საფრთხეს ნარკოტიკები

მე ვიქ­ნე­ბი დე­დო­ფა­ლი იმ სა­ინ­ფორ­მა­ციო კამ­პა­ნი­ის, რო­მე­ლიც უნდა ამ ქვე­ყა­ნა­ში გა­ი­მარ­თოს იმის­თვის, რომ ახალ­გაზ­რდე­ბი მიხ­ვდნენ, რამ­დე­ნად საფრ­თხეს წარ­მო­ად­გენს თა­ვი­ან­თი ჯან­მრთე­ლო­ბის­თვის ნარ­კო­ტი­კე­ბი, – ამის შე­სა­ხებ სა­ქარ­თვე­ლოს პრე­ზი­დენ­ტო­ბის და­მო­უ­კი­დე­ბელ­მა კან­დი­დატ­მა სა­ლო­მე ზუ­რა­ბიშ­ვილ­მა ურეკ­ში მო­სახ­ლე­ო­ბას­თან წი­ნა­სა­არ­ჩევ­ნო შეხ­ვედ­რის დას­რუ­ლე­ბის შემ­დეგ ჟურ­ნა­ლის­ტებ­თან სა­უბ­რი­სას გა­ნა­ცხა­და.

სა­ლო­მე ზუ­რა­ბიშ­ვილ­მა მე­დი­ას­თან სა­კუ­თარ პროგ­რა­მა­სა და პრი­ო­რი­ტე­ტებ­ზე კი­დევ ერთხელ ისა­უბ­რა და ყუ­რა­დღე­ბა გა­ა­მახ­ვი­ლა პრე­ზი­დენ­ტის როლ­სა და ფუნ­ქცი­ებ­ზე.

„ჩემ პროგ­რა­მა­სა და პრი­ო­რი­ტე­ტებ­ზე გე­ტყვით, რომ მე ვიქ­ნე­ბი ხალ­ხის­თვის მათი პრობ­ლე­მე­ბის მიმ­ტა­ნი ხე­ლი­სუფ­ლე­ბას­თან. არ შე­იძ­ლე­ბა პრე­ზი­დენ­ტი, რო­მე­ლიც არის ხალ­ხის მიერ არ­ჩე­უ­ლი, არ გახ­დეს პირ­ვე­ლი ხიდი სა­ზო­გა­დო­ე­ბას და ხე­ლი­სუფ­ლე­ბას შო­რის, რათა გა­დავ­წყვი­ტოთ ის პრობ­ლე­მე­ბი, რო­მელ­ზე­დაც არის პა­სუ­ხის­მგე­ბე­ლი პრე­ზი­დენ­ტი. მე ჩა­მოვ­თვა­ლე სქე­მე­ბი, რო­მე­ლიც ეხე­ბა ევ­რო­პუ­ლი სტან­დარ­ტე­ბის შე­მო­ტა­ნას ქვე­ყა­ნა­ში, რომ პრე­ზი­დენ­ტი უნდა იყოს დამ­ცვე­ლი ყვე­ლა იმ უფ­ლე­ბე­ბის, რო­მე­ლიც ჩა­წე­რი­ლია ახლა კონ­სტი­ტუ­ცი­ა­ში – ეს ეხე­ბა ქა­ლებს, შშმ პი­რებს, და­უც­ველ ფე­ნას, ასე­ვე ჯან­დაც­ვას. მე ამი­სი ად­ვო­კა­ტი ვიქ­ნე­ბი, რომ მივ­ხე­დოთ ბევ­რად მე­ტად პრე­ვენ­ცი­ას, ვიდ­რე აქამ­დე არის, რად­გან ჩვენ, რო­გორც ვნა­ხეთ, ძა­ლი­ან ბევ­რი გა­კეთ­და სა­ყო­ველ­თაო ჯან­დაც­ვის კუ­თხით, მაგ­რამ ნაკ­ლე­ბად პრე­ვენ­ცი­ის­თვის. იმ ადა­მი­ა­ნებს, რომ­ლე­ბიც მო­დი­ან ჩემ­თან, ძა­ლი­ან აღელ­ვებთ ეს სა­კი­თხი.

» Read more

კანონპროექტი არ ითვალისწინებს ნარკოტიკული საშუალებების წარმოებასა და რეალიზებას – ირაკლი კობახიძის განცხადება

”ჩვენ პირნათელი ვართ ქართული საზოგადოებისა და ეკლესიის წინაშე”, – ამის შესახებ განცხადებას საქართველოს პარლამენტის თავმჯდომარე ირაკლი კობახიძე ავრცელებს, რომელიც კანაფის წარმოება-ექსპორტის საკითხს შეეხება.

საქართველოს მთავრობამ კანაფის კულტივაცია-წარმოებასთან დაკავშირებული საკანონმდებლო კანონპროექტი შესაძლოა, პარლამენტიდან გაიწვიოს. » Read more

სოფიო ქაცარავა: „შვედეთი საქართველოს მნიშვნელოვანი პარტნიორი და მხარდამჭერია, როგორც ტერიტორიული მთლიანობის, ასევე საგარეო მისწრაფებების მიმართულებით

საგარეო ურთიერთობათა კომიტეტის თავმჯდომარე სოფიო ქაცარავა შვედეთის ელჩს საქართველოში ულრიკ ტიდესტრომს შეხვდა, რომელთანაც განიხილა ორმხრივი თანამშრომლობის საკითხები და საპარლამენტო დიპლომატიის როლი ამ მიმართულებით.

მხარეებმა, ასევე განიხილეს შვედეთ-საქართველოს ურთიერთობის დღის წესრიგი, ნორდიკულ-ბალტიკურ ქვეყნებთან თანამშრომლობის მნიშვნელობა და კონკრეტული გეგმები, ამ ფორმატში საგარეო ურთიერთობათა კომიტეტების თანამშრომლობის გაძლიერების საკითხები, რომელიც კავშირებს უფრო მეტად სისტემურს და ინსტიტუციურს გახდის.

საუბარი შეეხო პარლამენტში გამართული სტრატეგიული კომუნიკაციების ფორუმის შედეგებს, რეკომენდაციებს და მასთან დაკავშირებულ შემდგომ ნაბიჯებს, რაც საპარლამენტო ზედამხედველობის ფარგლებში განხორციელდება.

სოფიო ქაცარავამ ყურადღება გაამახვილა საგარეო პოლიტიკის უცვლელ კურსზე და ქვეყნის ტერიტორიული მთლიანობის საკითხზე,რაც დიდ გამოწვევად რჩება ქვეყნისთვის.